Նոր կառավարության ԲԿԳ աշխատանքային խմբի առաջին նիստը
Ըստ օրակարգի առաջին կետի ԲԿԳ քարտուղարի կողմից առաջարկվեց և մասնակիցների կողմից ընդունվեց ԲԿԳ գործողությունների չորրորդ ծրագրի մշակման և հրապարակման ժամկետ ընդունել ս.թ. սեպտեմբերի 30-ը:
Լիանա Դոյդոյանը տեղեկացրեց, որ ս.թ. հունիսի 22-ին Ինֆորմացիայի ազատության կենտրոնի կողմից կազմակերպվել էր հանրային քաննարկում՝ ԲԿԳ-Հայաստան գործընթացի շրջանակներում, որի ընթացքում քննարկվել են ԲԿԳ գործընթացի հանրայնացման, էլեկտրոնային տեղեկագրի թարմացման, հաշվետվությունների և նյութերի պարբերականության, յուրաքանչյուր նախարարությունում կոնտակտային անձերի նշանակման և նոր գործողությունների ծրագրի ձևաչափում ֆինանսական կետի ավելացման հարցերը:
Արարատ Միրզոյանը նշեց, որ նոր ծրագրում ընդգրկվող հանձնառություններից որոշների համար հնարավոր կլինի ապահովել ֆինանսական աջակցություն, քանի որ այս ամիսներին քննարկվում է պետական բյուջեի նախագիծը: Այնուհետև հավելեց, որ պետք է ավելի սերտ համագործակցել միջազգային կազմակերպությունների հետ:
Նաիրա Առաքելյանը տեղեկացրեց, որ Արմավիրի զարգացման կենտրոնը մասնակցել է ԲԿԳ նախաձեռնության կողմից հայտարարված նոր գործողությունների ծրագրի շրջանակներում մասնակցային իննովացիոն լուծումների մրցույթին և Համաշխարհային բանկի կողմից ստացել դրամական մրցանակ: Նոր գործիքը թույլ կտա ոչ միայն հավաքագրել առաջարկությունները հանրության լայն շրջանակի կողմից, այլև ապահովել հետագա գործողությունների ծրագիր մոնիտորինգը հանրության կողմից:
Արարատ Միրզոյանը կարևորեց Գործողությունների նոր ծրագրում հավակնոտ և ստեղծարար հանձնառությունների ստանձնումը, հանրային ծառայողների կողմից այլընտրանքային գաղափարների հավաքագրումը և մոնիտորինգի ապահովումը:
Թամարա Աբրահամյանը առաջարկեց անդրադառնալ նախորդ ծրագրով ստանձնած հանձնառություններին և ավարտին հասցնել ամբողջությամբ չիրականացվածները:
Արմեն Խուդավերդյանը առաջարկեց ընտրել թեմատիկ ուղղվածություն, սակայն քննարկման արդյունքում խմբի անդամները մտավախություն հայտնեցին, որ հավակնոտ հանձնառությունների շրջանակը նեղանում է:
Կարեն Զադոյանը առաջարկեց ս.թ. սեպտեմբերի կազմակերպել լայն քաննարկում՝ Կառուցողական երկխոսություն ծրագրի շրջանակներում:
Վարուժան Հոկտանյանը կարևորեց կառավարության ավելի նախաձեռնողական լինելը, դոնոր կազմակերպությունների ակտիվությունը և պետական բյուջեում ֆինանսական հատկացումների նախատեսումը:
Խմբի անդամները առաջարկեցին այս գործընթացում ներառել նաև Թվային Հայաստան հիմնադրամին:
Հանդիպման վերջում աշխատանքային խմբի ղեկավարը շնորհակալություն հայտնեց աշխատանքային խմբի անդամներին և միջազգային գործընկերների ներկայացուցիչներին՝ արդյունավետ քննարկման հանդիպման համար:
Դիտել տեսադարանը
